الكشري المصري على اصوله

المقادير
علي حسب عدد أفراد الاسرة
عدس أبو جبه يعني اللي فيه قشرة غامقه
رز مصري
مكرونه حجم صغير
بصل مقطع شرايح رفيعه ومقلي
صوص طماطم مكونه من
بصل مفروم ناعم + ثوم مفروم + طماطم مفرومه ف الخلاط
ملح + فلفل أسود + كمون + شطه حاره
صوص الثوم والخل
مكون من :
خل + ماء + ثوم مفروم + شطه+ ملح + كمون

طريقتي بالتفصيل يمكن تكون مختلف شويه ولكن الطعم مركز وأحلي من المطاعم بكتيييييييير
اولاً
بحمر البصل الاول في زيت غزير عشان يكون مقر مش
وافرده علي ورق مطبخ ليمتص الزيت الزائد
ثم أرش عليه قليل من الملح والكمون بيعطي طعم رائع للبصل
ودي صورة البصل المقرمش
وخلي بالك أوعي تغمقي لونه عشان مش يكون طعمه مر
بعد كده طبعا أنا بقول الخطوات بالترتيب عشان نستفيد بالزيت اللي حمرت فيه البصل
وكمان لان الزيت بيكون أخد طعم البصل
باخد الزيت واطبخ بيه العدس والرز والمكرونه
وبكدة استفدت منه بدل ما ارميه
وف نفس الوقت بيعطي طعم حلو
المهم نضع قليل من الزيت في حله ع النار
ثم الماء وشوية بصل من اللي قليناه
ولما يغلي الماء نضع العدس المغسول والمصفي
واحط كمون أهم شئ
وكتري كمية الماء لان هاناخد منه للرز
ولما يقرب ع الاستواء نضع الملح
أه ونسيت بحط مع العدس نصف مكعب ماجي
وبعد ما يستوي بصفيه من الماء واسيب العدس شويه ع نار هادئه
لغاية مايتبخر من المايه وينشف تماماً
ثم في إناء اخر نضع شويه من زيت اللي قليت بيه البصل
وأضيف ماء العدس واظبط الملح ولما يغلي أضيف الرز
واخليه يستوي عادي ذي طريقة الرز العاديه
بعد كده
المكرونه
ودي طريقتي فيها مختلفه شويه
بدل ما أسلقها ويكون مش لها طعم
بطبخها مثل الرز تمام
في إناء نضع شويه زيت
ثم الماء ومكعب ماجي وشوية فلفل اسود وملح
واخليهم يغلوا ثم أضيف المكرونه
مع مراعاة ان تكون كمية الماء يادوب تغطي وجه المكرونه
وأهدي النار جداً
واخليها تستوي مثل الرز
ودي بتكون طعمها احلي بكتيير من المسلوقه
خدتوا بالكوا من كمية المايه
وكمان بعد ما استوت مفلفله ولذيذة
بعد كده نجهز الصوص
نضع بصله صغيرة مفرومه ناعم مع فصين ثوم مفرومين ونشوحهم شويه ع النار
ثم نضيف الطماطم المعصورة
ومعلقه كبيرة خل
وملح وفلفل اسود وشطه للي بيحب الحراق
بس أكيد الكشري لازم يكون حار جداً
ونسيب الصوص يتسبك تماماً ع النار
بعد كده نجهز صوص
الثوم بالخل
وكمان طريقتي فيه مختلفه شويه
في إناء صغير نضع
3 فصوص ثوم مهروسه
وربع كوب خل
وماء
وملح وفلفل اسود وكمون وشطه مجروشه
واخليهم يغلوا غلوة واحدة ع النار
عشان كل حاجه تأخذ من بعضها ف الطعم
او تجهزيه ع البارد وتسبيه منقوع مع بعضه وتسبيه ف التلاجه بضع ساعات
وكمان قليت معاه باذنجان علي طريقتي
لزوم التحابيش وكمان بيفتح النفس

نيجي بقي للكشري
نضع طبقة من الرز
ثم العدس
ثم المكرونه
وهكذا حتي تنتهي الكميه
ونرش البصل ع الوجه
وعند التقديم نضع الصوص
بحد بجد لذيذ وطعمه خيال
وممكن تغيري ف الترتيب
تخلي المكرونه طبقه اولي ثم الرز ثم العدس
ذي ماتحبي
المهم هو في الاخر كشري ههه
أتمني تجربوه
متأكده إنه ها يعجبكوا
في رعاية الله وأمنه
ولا تنسوني من دعواتكم الصالحه
والحمد لله الذي أطعمنا وسقانا وكفانا فكم ممن لا كافي له ولا مأوي

thanks.......

بجد موضوع كتيييييير رائع ** بحب بلدى موووووووت ** ومشكورة على المجهود

وااااااااااااااااااااو جوعتينى اوووووووووى ايه رايك تعزمينى عليه هههههههه بجد موضوع كتييير حلوو شكرا

وااااااااااااااااااااااو بحب الكشري المصري وخاصه الصلصه لي فوقي يسلمو شهيتينه والله صلي زمااااااان مماكل كشري مصري

مشگورینن رآئعے. تقدآميے إلى الأفضلے ^_^

يعطيكي الف عافيه

موضوع جدا مفيد

انتضر جديدك ♥